کریستیانۆ ڕۆناڵدۆ کاریگەریی لەسەر یاریزانانی یانەی مانچستەر یونایتد دروستکردووە و سیستمی خۆراکی یانەکەی بەتەواوی گۆڕیوە.
ڕۆژنامەی دەیلی مەیڵی بەریتانی ئاشکرایکردووە، هەینی ڕابردوو دوای گەڕانەوەی کریستیانۆ ڕۆناڵدۆ بۆ یانەی مانچستەر یونایتد، یاریزانان بە تامەزرۆییەوە چاودێرییانکردووە، تاوەکو بزانن چی دەخوات و چ جۆرە خۆراکێک بەکاردەهێنێت.
لی گرانت، گۆڵپارێزی یونایتد ئاشکرایکردووە، لەدوای ڕۆناڵدۆ گۆڕانکاری بەسەر بیرکردنەوەی یاریزاناندا هاتووە، بەوپێیەی لەڕۆژی هەینییەوە تاوەکو ئێستا هیچ یاریزانێک دوای ژەمە خۆراکی ڕۆژانە شوکولاتە و شیرینی نەخواردووە.
لی گرانت دەڵێت، “ئەو پیاوە نائاساییە، هەموو یاریزانان سەرسامبوون تاوەکو بزانن قاپەکەی چی تێدایە، بینیم کینوا و ئەڤۆگادۆ و دوو هێلکەی سوورکراوەی تێدایە، یەکێکبوو لە تەندروستترین ژەمە خۆراکەکان، یاریزانان بەهۆی کریستیانۆوە گۆڕانکارییان بەسەرداهاتووە، تەنانەت لە هۆتێلی تایبەتی یانەکەش هیچ یەکێکیان بوێریی ئەوەیان نەبووە شوکولاتە و شیرینی و کێک و کاستەر بخۆن، سەرەڕای ئەوەی چەندین ساڵە، بەتایبەت لە شەوانی هەینی کەمێک لادانمان دەبێت و شیرینی دەخۆین”.
لی گرانت لە لێدوانەکانیدا دووپاتیدەکاتەوە، یاریزانان هەوڵدەدەن لاسایی “دۆن” بکەنەوە، “ڕەنگە بەوهۆیەوە یانەکەشمان خواردن و خواردنەوەی شیرینی دوای ژەمە خۆراکەکان لاببات”.
