بۆ ڕۆژی سێیەم لەسەر یەك لەلایەن هێزەكانی ئێرانەوە ناوچەكانی هەرێمی كوردستان بۆردومانكرا.
ئەمڕۆ لەلایەن هێزەكانی سوپای پاسدارانی ئێرانەوە ناوچەكانی بەربزێن و سیدەكان تۆپبارانكرا.
حزبی دیموكراتی كوردستانی ئێران (حدكا) بڵاویكردەوە، بۆ سێیەم ڕۆژە لەسەر یەك ناوچە مەدەنییەكان دەكرێنە ئامانجی بۆردومانەكان.
ئێوارەی دوێنێ-ش ئێران بە فڕۆكەی بێفڕۆكەوان دەوروبەری چەند گوندێكی لە دەڤەری برادۆست بۆردومان كرد.
دوای ئەو هێرشەش حدكا ڕایگەیاند كە درۆنێكی بۆمبڕێژكراوی ئێرانیان خستووەتە خوارەوە.
ئەو هێرش و پەلامارانەی ئێران لە ڕۆژی پێنجشەممەی ڕابردووەوە دەستیانپێكردووە، كە بە بۆردومان و تۆبارانی دەڤەرەكانی برادۆست، چۆمان و سیدەكان دەستیانپێكرد و تیایدا چەند بارەگایەكی حزبی دیموكراتی كردە ئامانج، بێ ئەوەی زیانی گیانیی هەبێت.
بەپێی ڕێكخراوی مافی مرۆڤی هەنگاو بۆ ئەو هێرشانە سوپای پاسداران تۆپخانەی لە شارەكانی شنۆ و پیرانشار جێگیركردووە.
