ئەنجومەنی وەزیرانی هەرێم پلانی نیشتمانیی هەرێمی کوردستان بۆ مافەکانی مرۆڤی تاووتوێكرد و پرۆژەیاسای سەرپەرشتیکردنی پڕۆژەکانی کشتوکاڵیشی پەسەندکرد
ئەنجومەنی وەزیرانی هەرێمی کوردستان ئەمڕۆ بە سەرپەرشتی مەسرور بارزانی، سەرۆکی ئەنجومەنی وەزیران و ئامادەبوونی قوباد تاڵەبانی، جێگری سەرۆک وەزیران کۆبوونەوەی ئاسایی خۆی ئەنجامدا.
لە بڕگەی یەکەمی کۆبوونەوەکەدا، ڕەشنووسی پرۆژەیاسای (سەرپەرشتیکردنی پڕۆژەکانی کشتوکاڵی لە هەرێمی کوردستان) لەلایەن بێگەرد تاڵەبانی وەزیری کشتوکاڵ و سەرچاوەکانی ئاو خرایەڕوو، دوای گفتوگۆ و ڕاگۆڕینەوە و خستنەڕووی چەند تێبینییەک، لەلایەن ئەنجومەنی وەزیرانەوە بە کۆی دەنگ پەسەندکرا و دواتر ڕەوانەی پەرلەمان دەکرێت بۆ تەشریعکردنی.
بەپێی ڕاگەیەنراوێكی كۆبوونەوەكە، یاساكە ڕۆڵی کاریگەری دەبێت لە دۆزینەوەی هەلی کار بۆ دەرچووانی کۆلێج و پەیمانگا و ئامادەییە کشتوکاڵییەکان و دەرچووانی خوێندنی پزیشکی ڤێرتێنەر ، ئەوانەیان کە لە فەرمانگەکانی حکومەت دانەمەزراون. هەروەها دەبێتە هۆی بوژاندنەوە و پێشخستنی پرۆژە کشتوکاڵییەکان لەژێر سەرپەرشتیی خاوەن توانای زانستی.
لە بڕگەی دووەمی کۆبوونەوەکەدا لەلایەن دیندار زێباری ڕێکخەری ڕاسپاردە نێودەوڵەتییەکان، (پلانی نیشتمانیی هەرێمی کوردستان بۆ مافەکانی مرۆڤ 2021- 2025) خرایەڕوو، وەک بەشێک لە پابەندیی هەرێمی کوردستان بە پلانی نیشتمانیی فیدراڵی کە لەسەر بنەمای ئەو ڕێککەوتننامە نێودەوڵەتییانەیە عێراق ئەندامە تێیاندا بە ڕەچاوکردنی تێبینی و ڕاسپاردەکانی ڕێکخراوە نێودەوڵەتییەکان کە ئامانج لێی گونجاندنی یاسا بەرکارەکانی هەرێمی کوردستانە لەگەڵ پەیماننامە و ڕێککەوتننامە نێودەوڵەتییەکان و ئەو ماف و ئازادییانەی لە دەستووری فیدڕاڵی هاتوون. دوای خستنەڕووی چەند سەرنج و تێبینییەک، بڕیاردرا لە کۆبوونەوەی هەفتەی داهاتووی ئەنجومەنی وەزیران، بڕیاری کۆتایی پەسەندکردنی بدرێت و بکەوێتە بواری جێبەجێکردنەوە.
