ژمارەیەك پەرلەمانتار پێشنیازە بڕیاری (پابەندكردنی حكومەت بە ئەرك و پابەندییە داراییەكان)یان پێشكەشی دەستەی سەرۆكایەتیی پەرلەمان كرد.
عومەر گوڵپی، ئەندامی پەرلەمانی كوردستان لەهەژماری خۆی لە تۆڕی كۆمەڵایەتیی فەیسبووك بڵاویكردووەتەوە، “هیواموایە لە زووترین كاتدا ئەم پێشنیازە بڕیارە ڕێكارە پەیڕەوی و یاساییەكان ببرێت و لە پەرلەمانەوە زۆرینە پاڵپشتی بن و ببێتە بڕیارێكی گرنگی پەرلەمان، چونكە هەموو ماددەكانی بڕیارەكە بەدیهێنانی بەرژەوەندیی گشتی و پاراستنی مافی هاوڵاتییان و فەرمانبەرانە و هیوایەكە بۆ پابەندكردنی حكومەت بە ئەركە داراییەكانی بەرانبەر بە هاوڵاتییان و فەرمانبەران.”
پێشنیازەكە لەلایەن 25 ئەندامی پەرلەمانەوە واژووكراوە و پێكهاتووە لە پێنج ماددە.
بەپێی حوكمەكانی هەر پێنج ماددەكە، حكومەت پابەند دەكات، بە كۆكردنەوەی سەرجەم داهاتە نەوتی و نانەوتییەكان و گەڕاندنەوەیان بۆ خەزێنەی گشتی.
هەروەها دەستپێكردنەوەی پلە بەرزكردنەوەی فەرمانبەران و خەرجكردنی سەرجەم شایستە داراییەكانیان بە پێی یاسا بەركارەكان.
لەخاڵێكی دیكەدا هاتووە، “دابەشكردنی مووچەی هەر مووچەخۆرێك وەك خۆی و نەگەڕانەوە بۆ دۆخی لێبڕین و پاشەكەوتكردن و پابەندیی تەواو بە حوكمەكانی ئەو یاسایانەی مووچە ڕێكدەخەن”.
كۆتا خاڵیش ئەوەیە، “خەرجكردنی هەر بڕەپارەیەك كە لە جێبەجێكردنی یاسای چاكسازی دەگەڕێتەوە بۆ بەرژەوەندیی گشتی و پێداچوونەوە و چاككردنی كەمترین مووچەی خانەنشینی”.
