كاركردن لە پرۆژەی یەكتربڕی باخی بەختیاری بەردەوامە و سەرپەرشتیاری پرۆژەكە دەڵێت، تەنها ئاستەنگ لە بەشێكیدا هەیە و لە هەوڵی چارەسەركردنیدان.
ئەحمەد حسێن، ئەندازیاری سەرپەرشتیاری پرۆژەی یەكتربڕی باخی بەختیاری بە تۆڕی میدیایی ئێستای راگەیاند، كاركردن لە پرۆژەكەدا بەردەوامە و رانەگیراوە، بەڵكو رێگری لە ئەنجامدانی كاری قیركردنی بەشێكیدا هەیە و لە هەوڵی چارەسەركردنیداین.
وتیشی، “پرۆژەی یەكتربڕی باخی بەختیاری 90%ی كارەكانی تەواو بووە، ئەگەر رێگری و ئاستەنگ نەیەتە پێشەوە تا مانگی ئازاری داهاتوو بە تەواوی ئامادەدەبێت”.
پرۆژەكە بریتییە لە دوو ئەندەرپاس و لەلایەن كۆمپانیای دەروازەی گەرمیان و بە سەرپەرشتیی شارەوانیی سلێمانی بە گوژمەی 12.5 ملیار دینار ئەنجامدەدرێت.
لەوەتەی دەست بە جێبەجێكردنی پرۆژەكە كراوە ئەمە دووەم جارە ئاستەنگی بۆ دروستدەكرێت.
