لە یەکێک لە بازگەکانی نزیک چەمچەماڵ، پۆلیسی گەرمیان دەستیگرت بەسەر 12 بارهەڵگری قاچاخدا کە جگەرە و دەرمانیان تێدابووە و بەنیازبوون بەرەوە ناوەراست و باشووری عێراق بیبەن.
لە لێدوانێکدا بۆ تۆڕی میدیایی ئێستا کامەران عومەر بەڕێوەبەری پۆلیسی کفری وتی، “شەوی ڕابردوو لە بازگەی نەوجول – قادرکەرەم دەستبەسەر 12 تۆن جگەرە و دەرمانی قاچاخدا گیراوە، ئێستا بارهەڵگرەکان لە بەڕێوەبەرایەتیی پۆلیسی کفرین”.
ئەو بارهەڵگرانە 11یان جگەرە و یەکێکیان دەرمانی تێدابووە، بەنیازبوون بەرەو پارێزگاکانی ناوەراست و باشووری عێراق بیبەن.
پێشتر بەفەرمانی قوباد تاڵەبانی جێگری سەرۆکی حکومەتی هەرێمی کوردستان بڕیاری توندوتۆڵکردنی دەروازە و بازگەکان درا بۆ ڕێگریکردن لە قاچاخچێتی و سزادانی ئەوانەی کاری هێنانی کاڵای قاچاخ دەکەن.
