بافڵ تاڵەبانی بۆ پێشمەرگە دێرینەکان: حەقی ئەوەتان بەسەرمانەوە هەیە خزمەتتان بکەین

بافڵ تاڵەبانی هاوسەرۆکی یەکێتیی نیشتمانیی کوردستان پاڵپشتیی خۆی بۆ خواستی پێشمەرگە دێرینەکانی یەکێتی دووپاتکردەوە و ڕایگەیاند، ” ئێوە کە سیمبولی تێکۆشان و خۆڕاگرین، حەقی ئەوەتان بەسەرمانەوە ھەیە کە خزمەتتان بکەین و وەفاداربین بەرامبەرتان”.

ئەمڕۆ دووشەممە بافڵ تاڵەبانی لەگەڵ ئەنجومەنی باڵا و لێپرسراو و نوێنەری نوسینگەکانی شار و شارۆچکەکانی کۆمەڵەی پێشمەرگە دێرینەکانی یەکێتیی نیشتمانیی کوردستان کۆبووەوە.

بەپێی ڕاگەیەندراوی کۆبوونەوەکە، پێشمەرگە دێرینەکانی یەکێتی داوایانکرد بافڵ تاڵەبانی پشتیوانیان بێت لە جێبەجێکردنی خواستەکانیان.

لەبەرامبەردا هاوسەرۆکی یەکێتی ڕایگەیاند، ” پێشمەرگە سەرمایەیەکی گرنگی میللەتەکەمانن و قوربانیدان و گیانفیداییتان جێگای ڕێز و پێزانینی بەردەواممانە”.

سەبارەت بە گۆڕانکاری و چاکسازییەکانی ناو یەکێتی هاوسەرۆکی یەکێتی وتی، ” یەکێتی بەرپرسیارە بەرامبەر خوێنی شەھیدان و قوربانیدانی خەڵکە خۆشەویستەکەمان، ئەم ھەنگاوانەش لەپێناو پاراستنی خەبات و قوربانیدانی پێشمەرگەی دێرین و تێکۆشەران بووە”.

هەروەها جەختیکردەوە، کە ڕێگەنادەن یەکێتی لەوەزیاتر بە لاڕێدا ببرێت و بکرێتە قوربانیی مەرامی شەخسی.

بافڵ تاڵەبانی ڕاشیگەیاند، “هەموومان پێکەوە یەکێتی ناو یەکێتی دەپارێزین و درێژەپێدەری سیاسەتی حەکیمانەی سەرۆک مام جەلال دەبین”.

داوای لێکردن کار بۆ سەرخستنی هاوپەیمانی کوردستان بکەن و سەرکەوتن تۆماربکەن لە هەڵبژاردنەکانی پەرلەمانی عێراقدا.

     

بابەتی پێشتر

كۆرۆنا ناوەندی تەمەنی لە ئیتاڵیا كەمكردوەتەوە

بابەتی دواتر

دهۆك.. 260 دەفتەر دۆلار و چوار کیلۆ زێڕی دزراو بۆ خاوەنەكەی گەڕێندرایەوە

بابەتی پەیوەندیدار
Total
1
Share