بەیانیی ئەمڕۆ نزیک کاتژمێر 8:30 خولەک، فڕۆکەی بێفڕۆکەوانی تورکی یەکێک لە خێمەکانی کامپی “ڕۆستەم جودی”ی لە مەخمور بۆردومانکرد.
بەپێی زانیارییەکان بۆردومانەکە زیانی گیانی نەبووە و تەنها زیانی ماددی بەو شوێنە گەیاندووە، لەگەڵ ئەوەشدا ترس و دڵەڕاوکێی لە کامپەکەدا بڵاوکردووەتەوە.
چاوەڕێ دەکرێت ئیدارەی بەڕێوەبردنی کامپی مەخمور لەبارەی بۆردومانەکەوە ڕاگەیەندراوێکی هەبێت و وردەکاریی هێرشەکە بخاتەڕوو.
ئەمساڵ ئەوە دووەمجارە کە کامپی مەخمور لەلایەن سوپای تورکیاوە بۆردوماندەکرێت، لەکاتێکدا شوێنەکە سنووریی نییە و تەنها 55 کیلۆمەتر لە پایتەختی هەرێمی کوردستانەوە دوورە.
كامپی شەهید ڕۆستەم جودی ساڵی 1998 بەسەرپەرشتیی نەتەوە یەکگرتووەکان بۆ ئەو ئاوارانەی باکووری کوردستان دروستکرا، کە لەژێر فشاری تورکیادا ماڵ و حاڵی خۆیان جێهێشتبوو و پەنایان بۆ هەرێمی کوردستان هێنابوو.
کوردەکانی باکووری کوردستان بەچەند قۆناغێک لە کامپی مەخمور گیرسانەوە، سەرەتا لە نزیک دهۆک دانران و دواتر گوێزرانەوە بۆ شێخان، دوای ئەوەش بە قۆناغێکی دیکە لە خوارووی مەخمور نیشتەجێکران.
