ئەندامێكی لیژنەی یاسایی لە پەرلەمانی كوردستان ڕایدەگەیەنێت، لە خولی پایزەی پەرلەماندا كۆمەڵێك پرۆژەیاسا هەن كاری لەسەردەكەن، كە زۆرینەیان پەیوەندیی بەژیانی هاوڵاتییان و باشتركردنی دۆخی ژیانیان هەیە.
جەلال محەمەد، ئەندامی لیژنەی یاسایی لە پەرلەمانی كوردستان بە تۆڕی میدیایی ئێستای ڕاگەیاند، “خولی پایزە دەستیپێكردووەتەوە، دەستەی سەرۆكایەتیی پەرلەمانیش پرۆژەیاساكان دیاریدەكات كە پەرلەمان كاری لەسەربكات”.
باسی لەوەشكرد، “هەوڵ دەدرێت كۆمەڵێك پرۆژەیاسا كە پەیوەندیی ڕاستەوخۆیان بە ژیانی خەڵكەوە هەیە لەم خولە تێپەڕێندرێن بۆ باشتركردنی ژیانی هاوڵاتییان”.
دەربارەی ئەوەی كە كاری لە پێشینەی ئەم خولە چی دەبێت؟ جەلال محەمەد ئاشكرایكرد، لەنێو پرۆژەیاساكاندا، پرۆژەیاسای بودجە، هەمواركردنەوەی یاسای ناوخۆ، هەمواری یاسای وەبەرهێنان و چەند یاسایەكی تایبەت بە مەلەفی نەوت كە بتوانێت چاكسازی لەو بوارەدا بكات، هەن.
لەبارەی ئەوەی كە ئایا كار لەسەر دەستوور دەكرێت؟، ئەندامەكەی لیژنەی یاسایی پەرلەمان جەختی لەوەكردەوە، “پرسی دەستوور بابەتێكە تا ڕادەیەك كۆدەنگی لەسەرە، بەڵام میكانیزمی كاركردن لەسەری پێویستی بە لێكنزیكبوونەوەی لایەنەكان و ڕێككەوتنی لایەنەكان هەیە”.
دانیشتنەكەی ئەمڕۆ چوارشەممەی پەرلەمانی كوردستان ژماره (1)ی ئاسایی خولی پایزەی ساڵی سێیەم له خولی پێنجهمی ههڵبژاردنی پهرلهمان بوو.
