دەریاوانیی تورکیا، ئەمڕۆ پێنجشەممە 22ی تشرینی یەکەم، ئاشکرایکرد کە تاوەکو 27ی تشرینی یەکەم کەشتیی ڕوپێوی ئۆروچ ڕەیس لە ناوچە ناکۆکەکانی باکوری خۆرهەڵاتی دەریای ناوەراست دەمێنێتەوە.
ئەمە لەکاتێکدایە پێشتر دەریاوانیی تورکیا ڕایگەیاند ئەو سێ کەشتییە ڕووپێوییە تاوەکو 22ی تشرینی یەکەم لە خۆرهەڵاتی دەریای ناوەڕاست دەمێننەوە.
ناکۆکییەکانی نێوان تورکیا و یۆنان (دوو ئەندامەکەی ناتۆ)، تاوەکو ئێستا بەردەوامە لەسەر ئەو وزەیەی لە خۆرهەڵاتی دەریای ناوەڕاست هەیە.
پێشتریش سەرۆکوەزیرانی یۆنان لە کۆنگرەیەکی ڕۆژنامەوانیدا ڕۆژی چوارشەممەی ڕابردوو ڕایگەیاند کە ئەنقەرە جارێکی دیکە پێشێلکارییەکانی دووبارەکردەوە لە گەڕانەکانی لە خۆرهەڵاتی دەریای ناوەڕاست.
ناکۆکییەکانی نێوان تورکیا و یۆنان لە مانگی ئابی ڕابردوودا دەستیپێکرد، دوای ئەوەی ئەنقەرە کەشتیی ئۆروچ ڕەیسی ڕەوانەی خۆرهەڵاتی دەریای ناوەڕاست کرد.
