كۆمارى خاكى سۆماڵ “سۆماڵیلاند” ڕایگه‌یاند، ئاماده‌یه په‌نابه‌رانى ئه‌فغانى وه‌ربگرێت و بۆ ئه‌و مه‌به‌سته له‌گه‌ڵ كاربه‌ده‌ستانى ئه‌مریكا له وتووێژدایه.
به‌گوێره‌ی ئاژانسی هه‌واڵی فرانس پرێس، وه‌زاره‌تى ده‌ره‌وه‌ى سۆماڵیلاند ڕایگه‌یاندووه، “ئاماده‌ین بۆ ماوه‌یه‌ك په‌نابه‌رانى ئه‌فغانى وه‌ربگرین، ڕێككه‌وتنێكی سه‌ره‌تاییمان بۆ ئه‌و مه‌به‌سته كردووه و له‌گه‌ڵ كاربه‌ده‌ستانى ئه‌مریكادا گفتوگۆده‌كه‌ین بۆ سه‌رخستنى”.
وه‌زاره‌تى ده‌ره‌وه‌ى سۆماڵیلاند ئاماژه‌ی بۆ ئه‌وه‌شكردووه كه شێوازى گواستنه‌وه‌ى په‌نابه‌رانى ئه‌فغانی بۆ وڵاته‌كه‌ى و كاتى گه‌یشتنیان ده‌ستنیشان نه‌كراون.
سۆماڵیلاند “خاكى سۆماڵ” ماوه‌ى 30 ساڵه له سۆماڵ جیابووه‌ته‌وه و سه‌ربه‌خۆیی خۆی ڕاگه‌یاندووه، ئاڵا و حكومه‌ت و سوپا و دراوى خۆی هه‌یه، به‌ڵام له‌ڕووی نێوده‌وڵه‌تییه‌وه وه‌ك وڵاتێكی سه‌ربه‌خۆ دانى پێدانه‌نراوه.
