وەزارەتی كارەبای عێراق ڕایگەیاند، هێڵی گواستنەوەی كارەبا لەنێوان كەركوك و هەولێر لە كردەوەیەكی تێكدەرانەدا تەقێندرایەوە.
لە ڕاگەیەندراوێكدا وەزارەتی كارەبای عێراق ئاماژەی بەوەكردووە، “شەوی ڕابردوو هێڵی گواستنەوەی كارەبای كەركوك – هەولێر 400 كەی ڤی لە كردەوەیەكی تێكدەرانەدا تەقێندراوەتەوە”.
ئاماژەی بەوەشكردووە، “هێڵەكە لەنێوان گوندی شیرناوا و چەخماخە لە سنووری پارێزگای كەركوك لە ڕێگەی بۆمبی چێندراوە تەقێندراوەتەوە”.
هەر بەپێی ڕاگەیەندراوەكە، بەهۆی ئەو كردەوە تێكدەرانەیەوە زیان بە تاوەرەكانی كارەبا گەیشتووە و تیمە هونەری و ئەندازیارییەكانی كارەبا لەگەڵ هێزە ئەمنییەكان گەیشتوونەتە ئەو شوێنە بۆ چاككردنەوەی لە ماوەیەكی كەمدا.
پێشتر لایەنە سەربازی و ئەمنییەكانی عێراق دووپاتیانكردبووەوە، ئەوانەی تاوەر و هێڵەكانی گواستنەوەی كارەبا دەكەنە ئامانج، سەر بە داعشن.
