بەڕێوەبەری کەشناسیی سلێمانی ڕایدەگەیەنێت، مەرج نییە هەر ساڵێک دیاردەی ئێل نینۆ ڕوویدا ڕێژەیەکی باش باران ببارێت، ساڵ هەبووە ئێل نینۆ بووە و باران کەم باریوە.
جەوهەر حەمەلاو، بەڕێوەبەری کەشناسیی سلێمانی بە تۆڕی میدیایی ئێستای ڕاگەیاند، بەگوێرەی ڕاپۆرتە کەشناسییەکان، دۆخی کەشی ئێستا نۆرماڵە و بەرەو دۆخی ئێل نینۆ دەچێت، [دیاردەی ئێل نینۆ بریتییە لە گەرمبوونی ڕووی زەریای هیندی، کە تیایدا لە ناوچەکانی هەرێمی کوردستان ڕێژەی باران سەروو ئاستی ئاسایی و نۆرماڵ دەبێت]، بەڵام مەرج نییە هەر ساڵێک ئێل نینۆ ڕوویدا بە مانای ئەوەبێت بڕێکی زۆر باران ببارێت، بەڵکو ساڵ هەبووە ئێل نینۆ بووە و بڕی بارانبارین ئاسایی بووە، ساڵیش هەبووە لا نینا بووە و بارانی باشیش باریوە.
ڕوونیشیکردەوە، ئاو و هەوا هەمیشە لە گۆڕاندایە و مەرج نییە جێگیربێت، چەند دیاردەیەک هەیە کاریگەرییان لەسەر ئاو و هەوای ناوچەیەک هەیە، بەڵام ئەم حاڵەتانە، دەبێت هەمیشە دۆخەکان لەباربن تا ڕێژەیەکی باش باران ببارێت، بەڵام ئەگەر دوو حاڵەت ڕووبدات و یەکێکیان ڕوونەدات کاریگەرییەکەی بەوشێوەیە نابێت.
