ئەمشەو، چوارشەممە یانەی ڕیاڵ مەدریدی ئیسپانی لە چوارچێوەی ڕوبەڕوبوونەوەکانی گەڕی یەکەمی قۆناغی کۆمەڵەکانی چامپیۆنزلیگ، بەرانبەر یانەی شاختار دۆستیکی ئۆکرانی یاریدەکات.
بڕیارە ڕوبەڕوبوونەوەکە کاتژمێر (7:55) بە کاتی هەرێمی کوردستان لە یاریگای دی ستیفانۆ لە شاری مەدرید بەبێ ئامادەبوونی هاندەران ئەنجامبدرێت.
یانەکانی ڕیاڵ مەدرید و شاختار دەکەونە کۆمەڵەی دووەمی قۆناغی کۆمەڵەکان و لەهەمان گروپدا یانەکانی ئینتەرمیلان و بوروسیا مونشنگلادباخ بوونیان هەیە، ئەم دوو یانەیەش کاتژمێر دە بە کاتی هەرێمی کوردستان بەرانبەر یەکدی یاریدەکەن.
چەند زانیارییەکی ژمارەیی لەبارەی یاری نێوان ڕیاڵ و شاختار:
- سێیەمجارە ڕیاڵ و شاختار لە خولی یانە پاڵەوانەکانی ئەوروپا ڕوبەڕودەبنەوە، شاهانەی مەدرید دووجار براوە بووە.
- لە کۆتا دوو ڕوبەڕوبوونەوەی نێوان دوو یانەی ناوبراو، شاختار هەشت گۆڵی لەسەر تۆمارکراوە.
- لە کۆتا ڕوبەڕوبوونەوەی نێوان یانەی ریاڵ مەدرید و یانە ئۆکرانییەکان بە گشتی، شاهانە هەرگیز دۆڕاندنی تۆمارنەکردووە (پێنج بردنەوە و سێ یەکسانبوون).
- شاختار لە حەوت کۆتا یاری دەستپێکی چامپیۆنزلیگ تەنها دووجار دۆڕاندنی تۆمارکردووە.
- ڕیاڵ مەدرید لە کۆی 28 بەشداری لە خولی یانە پاڵەوانەکان، هەموو جارێک قۆناغی کۆمەڵەکانی تێپەراندووە.
