ئەتلەتیکۆ مەدرید لە گواستنەوەی یەکێک لە باشترین یاریزانانی تیمی ئۆڵیمپی ئیسپانیا نزیکبووەتەوە.
ڕۆژنامەی مارکای ئیسپانی ئاشکرایکردووە، بەڕێوەبەرانی ئەتلەتیکۆ لە ئێستادا سەرقاڵن بە دانوستاندن بۆ گواستنەوەی ڕافا میر، هێرشبەری ئۆڵیمپی هەڵبژاردەی ئیسپانیا.
ڕافا سەرەڕای ئەوەی سەرەتاکانی لە یانەی ڤالێنسیا بووە، بەڵام بەفەرمی یاریزانی یانەی وڵڤەرهامپتنە و لە 2018وە بەخواستن بۆ یانەکانی لاس پاڵماس، نۆتینگهام فۆرێست و هوێسکا یاریکردووە.
هێرشبەرە تەمەن 24 ساڵەکە لە پێگەی ژمارە (9) یاریدەکات، وەرزی ڕابردوو 16 گۆڵی لە خولی پلە یەك بۆ هوێسکا تۆمارکردووە، بەڵام یانەكە دابەزی بۆ پلە دوو، نرخی گواستنەوەی تەنها 15 ملیۆن یورۆیە.
بەپێی سەرچاوەکە، لەسەر ڕاسپاردەی دیێگۆ سیمیۆنی، ڕافا میر پەیوەندی بە ئەتلەتیکۆ مەدریدەوە دەکات، دەبێتە هاوکار و جێگرەوەی لویس سوارێز، بەم جۆرەش خۆیان لە واژووکردنی بۆندێکی گەورە و گرانبەها دەپارێزن، بەوپێیەی لە پێشوودا هەوڵەکانیان بە ئاڕاستەی ئەنتوان گریزمان و چەند گرانبەهایەکی دیکە بووە.
