وەزارەتی کارەبای عێراق ڕایگەیاند، هێڵی گواستنەوەی کارەبای کەرکوک-گەیارە كە 400 کەیڤی-یە، لە کەرکوک ڕوبەڕووی هێرشی “تیرۆریستی” بووەتەوە.
لە ڕاگەیەندراوێكدا وەزارەتی كارەبای عێراق ئاماژەی بۆ ئەوە كردووە، ئەمڕۆ هێڵی کارەبای کەرکوک-گەیارە كە 400 کەیڤییە، لەڕێگەی بۆمبی چێندراوەوە ڕوبەڕووی هێرش بووەتەوە، بەهۆیەوە زیان بەر یەکێک لە تاوەرەکان کەوتووە.
وەزارەتەكە باسی لەوەشكردووە، دوای هێرشەکە تیمەکانی کارەبا و هێزێكی ئەمنی گەیشتوونەتە شوێنەکە بەمەبەستی چاککردنەوە و بەگەڕخستنەوەی تاوەرەکە و دۆزینەوەی ئەنجامدەرانی هێرشەکە.
هاوكات لەڕێگەی بۆمبی چێنراوە هێرشكرایەسەر هێڵی گواستنەوەی كارەبای (سەڵاحەدین-ڕۆژئاوای بەغداد) .
وەزارەتی کارەبا دەڵێت، “بەهۆی هێرشەكە كاریگەری لەسەر كارەبای پارێزگای سەڵاحەدین دروستبووە”.
