هاوپەیمانیی نێودەوڵەتی ئاشکرایکرد، لەدوای ساڵی 2014ەوە بە بڕی پێنج ملیار دۆلار پێداویستی و ئامێریان بۆ هێزە عێراقییەکان دابینکردووە، ئەرکەکانیشیان لەدوای کشانەوەی هێزە شەڕکەرەکانی ئەمریکا بە ڕێککەوتنی هەردوو وڵات پاڵپشتیکردنی هێزە عێراقییەکان دەبێت.
واین مارۆتۆ وتەبێژی هێزەکانی هاوپەیمانان لە عێراق بە میدیا عێراقییەکانی ڕاگەیاندووە، لە هەفتەی پێشوودا بەبڕی 35 ملیۆن دۆلار هێزە عێراقییەکان لەلایەن هاوپەیمانانەوە پڕچەککراون، ئەمەش لە سندوقی پەرەپێدانی هێزە عێراقییەکان لەلایەن هێزەکانی ئەمریکاوە بووە.
ڕاشیگەیاندووە، ئەو پێداویستییانەی دابینکراون ئامێرەکانی پەیوەندیکردن و هاوکاریی هەواڵگری و سەرجەم بوارەکانی پەیوەست بە هێزە ئەمنییەکانی گرتووەتەوە، ئەو هاوکارییانەش بەردەوامییان دەبێت لە ئەگەری کشانەوەی هێزە شەڕکەرەکانی ئەمریکاشدا.
