نرخی هێلکە لە بازاڕەکانی هەرێمی کوردستاندا، ماوەی دوو ڕۆژە بۆ دووئەوەندەی نرخەکەی پێشووی بەرزبووەتەوە و لیژنەی کشتوکاڵی پەرلەمانی کوردستانیش ڕایگەیاند، داوامان لە وەزارەتی کشتوکاڵ کردووە بۆ چارسەرەکردنی ئەو گرفتە قەدەغەی هاوردەکردنی هێلکە لە دەرەوە ڕابگرێت.
جێگری سەرۆکی لیژنەی کشتوکاڵی پەرلەمانی دەڵێت، “هۆکاری بەرزبوونەوەی نرخی هێلکە بۆئەوە دەگەڕێتەوە پێشتر لەلایەن وەزارەتی کشتوکاڵەوە بۆ پاڵپشتیی بەرهەمی ناوخۆ قەدەغەی هاوردەکردنی هێلکە کرا، ئێستاش بەرهەمی ناوخۆ خواست لەسەری بەرزبووەتەوە چونکە ڕەوانەی ناوەڕاست و خوارووی عێراق دەکرێت، ئەمەش لە بازاڕەکانی هەرێمدا بەرهەمەکەی کەمکردووەتەوە”.
شوان کەریم ئاشکرایکرد کە دوێنێ بە نوسراوێک لیژنەکەیان داوای لە وەزارەتی کشتوکاڵی هەرێمی کوردستان کردووە کە بڕیاری قەدەغەکردنی هاوردەکردنی هێلکە لەدەرەوەی هەرێمەوە ڕابگیرێت لەگەڵ ئەوەشدا هاوسەنگی لەنێوان بەرهەمی ناوخۆ و بەرهەمی هاوردەکراودا بکرێت.
ئاماژەی بەوەشکرد دوێنێ یەکشەممە 18ی تشرینی یەکەم، نوسراوەکەیان ڕەوانەی پەرلەمان کردووە و بڕیارە ڕۆژی چوارشەممە وەڵامیانبدرێتەوە.
