چوار پەرلەمانتاری كورد دەڵێن كێشەی غازی چەند ڕۆژی ڕابردوویان لە گەرمیان و هەندێك ناوچەی سلێمانی چارەسەركردووە، لەهەوڵیشدان كێشەی گرانیی نرخی بەنزینیش چارەسەر بكەن.
چوار ئەندامی ئەنجومەنی نوێنەران ڕایدەگەیەنن، پاش بەدواداچوونیان بۆ کێشەی گرانبوون و کەمبوونەوەی غاز لە گەرمیان و هەندێك ناوچەی سلێمانی، توانیویانە کێشەی ژمارەیەک کارگەی بەرهەمهێنانی غاز چارەسەر بکەن.
پەرلەمانتارانی كورد، غالب محەمەد، ئەحمەد حاجی رٍەشید، سەرکەوت شەمسەدین و ڕێبوار کەریم مەحمود لە ڕاگەیەندراوێكدا ئاماژەیان بەوەكردووە، “پاش بەدواداچوونمان بۆ کێشەی گرانبوون و کەمبوونەوەی غاز لە گەرمیان و هەندێك ناوچەی سلێمانی، توانیمان بگەینە ئەنجامێک و کێشەی ژمارەیەک کارگەی بەرهەمهێنانی غاز چارەسەر بکەین”.
ئەو پەرلەمانتارانە دەڵێن، “بوینە کەفیل تاوەكو بەر لە جەژن دابەشکردنی غازی شلی ماڵان نەوەستێت و گرفتی کەمیی غاز دروست نەبێت”.
جەختیان لەوەشكردووەتەوە، “پاش جەژن لە ڕێگەی حکومەتی خۆجێیی کێشەی کارگەکانی غاز و وەزارەتی نەوتی عێراق چارەسەر دەکەین”.
ئەو پەرلەمانتارانە ئاشكراشیانكردووە، لە ئێستادا هەوڵەکانیان چرکردۆتەوە بۆ چارەسەرکردنی گرفتی بەنزین لە پارێزگاكانی هەرێم بە هاوکاری حکومەتی فیدڕاڵ.
