بەڕێوەبەری نەخۆشخانەی شۆڕش لە سلێمانی، دکتۆر چالاک قەشانی، ئەمشەو دووشەممە 10ی ئاب، ڕایگەیاند هونەرمەندی ناسراوی کورد، سابیر کوردستانی دوای تووشبوونی بە ڤایرۆسی کۆرۆنای نوێ و تێکچوونی دۆخی تەندروستی، لە تەمەنی 65 ساڵیدا گیانیلەدەستدا.
دکتۆر چالاک قەشانی لە لێدوانێکی تایبەتدا بۆ تۆڕی میدیایی ئێستا وتی، “هونەرمەند سابیر کوردستانی لە دوێنێوە باری تەندروستیی ناجێگیر بوو و خرابووە ژێر ئامێری هەناسەدانی دەستکرد، سەرەڕای جێبەجێکردنی هەموو ڕێکارە پزیشکی و تەندروستییەکان، بەڵام ئەمشەو لە کاتژمێر 10:00 گیانیلەدەستدا.”
هونەرمەند سابیر کوردستانی، یەکێک لە دەنگە ڕەسەنەکانی هونەری گۆرانیی کوردی، لە ساڵی 1955 لە شاری کەرکووک لەدایک بوو، ژیانی هاوسەری پێکهێنابوو و خاوەنی سێ کچ و یەک کوڕ بوو.
بەڕێوەبەری گشتیی تەندروستیی سلێمانی، دکتۆر سەباح هەورامی لە پەیجی تایبەتیی خۆی لە فەیسبوک گیانلەدەستدانی هونەرمەند سابیر کوردستانی پشتڕاستکردووەتەوە و نووسیویەتی، “بەداخەوە، هونەرمەند سابیر کوردستانی، یەکێک لە هونەرمەندە ڕەسەن و دەنگخۆشەکانی کوردستان، بەهۆی ڤایرۆسی کۆرۆناوە لە سلێمانی کۆچی دواییکرد.”
سابیر کوردستانی، لە ساڵی 1971 یەکەم گۆرانیی خۆی لە کەناڵی تەلەڤزیۆنی کەرکووک تۆمارکرد.
