دوای ئەوەی ئێوارەی ئەمڕۆ هێزێكی سەر بە سكرتاریەتی یەكێتی چوونە ناو كەناڵی ئای پڵەس، بەرپرسێكی حزبەكە ڕایدەگەیەنێت، هەر كەناڵ و میدیایەك بە پارەی یەكێتی دروستكرابێت دەبێت بگەڕێندرێتەوە بۆ خودی یەكێتی.
ئێوارەی ئەمڕۆ هێزێك چوونە ناو كەناڵی (ئای پڵەس)، كە كەناڵێكی نوێیە و هێشتا دەستی بە پەخش نەكردووە و، داوایان لە كارمەندانی كرد جێیبهێڵن.
بەرپرسێكی باڵای یەكێتیی نیشتمانیی كوردستان بە تۆڕی میدیایی ئێستای وت، هێزەكە سەر بە سكرتاریەت بوون و بەو ئەركە ڕاسپێردراون و داوایان لە كارمەندەكان كردووە كەناڵەكە جێبهێڵن.
بەرپرسەكە ئەوەشی وت، “خاوەندارێتی كەناڵەكە یەكێتی-یە و دەگەڕێتەوە بۆ یەكێتی” دوپاتیشیكردەوە، “هەر كەناڵ و میدیایەك بە پارەی یەكێتی دروستكرابێت، موڵكی حزبە و دەبێت بگەڕێندرێتەوە بۆ یەكێتی، ئەو هەنگاوەی هێزەكەی سكرتاریەتیش لەو چوارچێوەیەدا بووە”.
