لە دوو ڕووداوی جیاوازدا لە ئیدارەی ڕاپەڕین بەهۆی شێلانی ئۆتۆمبیلەوە دوو منداڵ گیانيان لە دەستدا.
بەپێی راگەیەندراوێکی بەڕێوەبەرایەتی پۆلیسی ڕاپەڕین، “ئەمڕۆ یەكشەممە کاتژمێر پێنجی سەرلە ئێوارە، لە گەڕەکی ئازادی دوو لە ڕانیە لەڕووداوێکی هاتوچۆدا لە جۆری شێلان ئۆتۆمبێلێك لە جۆری تویتا هایلوکس منداڵێکی بەناوی (ژ، م، خ) تەمەن شەش ساڵی لە ڕەگەزی نێر لە بەردەم ماڵی خۆیان شێلا بە هۆیەوە گیانی لەدەستدا”.
ئاماژەی بەوەشكراوە، “دوای ئەنجامدانی پشکنینی توێکاری لە پزیشکی دادوەری ڕانیە تەرمی ناوبراو ڕادەستی کەس و کاری کرایەوە”.
باسلەوەشكراوە، “پەڕاوی لێکۆڵینەوە بۆ ڕووداوەکە کرایەوە و شۆفێری ئۆتۆمبیلەکە بەناوی (هـ ، ا، ع) لە دایکبووی 1990 لە ڕەگەزی نێر بە پێی مادەی 24 لە یاسای هاتوچۆ ڕاگیراوە و لێکۆڵینەوە لە ڕووداوەکە بەردەوامە”.
لەلایەكی دیكەوە، هەر بەپێی ڕاگەیەندراویکی پۆلیسی ڕاپەڕین، “ئەمڕۆ لە ناحیەی چوارقوڕنە، لە ڕووداوێكی هاتوچۆدا لە جۆری شێلان منداڵێك بەناوی (ی، ع، م) تەمەن چوارساڵ لە ڕەگەزی نێر بەهۆی بەركەوتنی ئۆتۆمبیل لە جۆری “فۆرد ڕەنجەر پیكاب” گیانی لەدەستدا، دوای ئەنجامدانی پشكنینی توێکاری لە پزیشکی دادوەری ڕانیە تەرمەكەی ڕادەستی کەس و کاری كرایەوە”.
ئەوەشخراوەتەڕوو، “پەڕاوی لێكۆڵینەوە بۆ ڕووداوەكە كرایەوە و شۆفێری ئۆتۆمبیلەكەش بەناوی (ب، م، م) لە دایكبووی 1992 لە ڕەگەزی نێر بە پێی مادەی 24 لە یاسای هاتوچۆ ڕاگیراوە و لێكۆڵینەوە لە ڕووداوەکە بەردەوامە”.
