نیوەڕۆی ئەمڕۆ سێ چەکداری داعش لە نێوان خانەقین و ناحیەی گوڵاڵە، هەڕەشەیان لە چەند گوندنشینێک کردووە و دواتر ئاسایشی گەرمیان و پێشمەرگە لەناوچەی میرخاس، سەرقاڵی دۆزینەوەیان بوون.
پەیامنێری تۆڕی میدیایی ئێستا لە گەرمیان ڕایگەیاند، “هێزێکی زۆری ئاسایش و پێشمەرگە لەسەر ڕوباری سیروان ئۆپەراسیۆنێکیان دەستپێکردووە، بۆ دۆزینەوەی چەکدارەکان”.
ئەو ناوچەیەی کە چەکدارەکانی داعشی تێدا بیندراوە، پشتی بە گوندە عەرەبەکانی ناوچەکەوەیە و لە دیووی باشوری ڕۆژهەڵاتی ناوچە کوردییەکانە.
لەماوەی ڕابردوودا چەکدارانی داعش چەندجارێک لەو ناوچەیە خۆیان نیشانداوە و هاوڵاتیانیان ڕفاندووە، بەهۆی بوونی سەوزایی و زەلکاوی ئاوی ڕوباری سیروان دۆزینەوەی چەکدارەکان بۆ هێزە ئەمنییەکان قورس بووە.
