سەرچاوەیەکی ئەمنی لە ئاسایشی گەرمیانەوە بە تۆڕی میدیایی ئێستای ڕاگەیاند، لە کاتی بەربانگدا دوو گولـلە کاتیۆشا ئاڕاستەی شاری کفری کراون و یەکێکیان لەناو بازاڕی کفری کەوتووەتە خوارەوە.
ئەو سەرچاوەیە ئاشکرایکرد، یەکێک لە گولـلە کاتیۆشاکان لە باوەشاسوار کەوتووەتە خوارەوە و هەردوو گولـلە کاتیۆشاکە هیچ زیانێکی گیانیان لێ نەکەوتووەتەوە.
پەیامنێری تۆڕی میدیایی ئێستا لە گەرمیان ڕایگەیاند، ئاسایشی گەرمیان لێکۆڵینەوەی لە ڕوداوەکە دەستپێکردووە و سەرقاڵی دۆزینەوەی ئاڕاستەی هاویشتنی گولـلە کاتیۆشاکانن.
شاری کفری دەکەوێتە نێوان سنوری هێزەکانی پێشمەرگە و سوپای عێراق و پێشتریش وەزارەتی پێشمەرگە و سوپای عێراق جەختیان لە هەماهەنگی زیاتر کردووەتەوە بۆ پاراستنی ئەو سنورانەی دەکەوێتە نێوان هەردووکیانەوە تا بۆشای ئەمنی تێیدا ڕونەدات.
