پەیامنێری تۆڕی میدیایی ئێستا ڕایگەیاند، نیوەڕۆی ئەمڕۆ لەکاتی ڕاوەماسیدا نارنجۆکێک بە دوو گەنجدا تەقیووەتەوە و بەهۆیەوە گەنجێک گیانی لە دەستدا و گەنجەکەی دیکە بریندار بووە.
بەپێی زانیارییەکان ئەو گەنجەی گیانی لە دەستداوە ناوی (ئەمحەد مەولود)ە و دانیشتووی ناحیەی کەڵەکە و خێزاندارە و دوو منداڵی هەیە.
پەیامنێری تۆڕی میدیایی ئێستا ئاشكرایکرد، لە کاتی ڕاوکردنەکەدا سێ کەس لە شوێنی ڕوداوەکە بوون، بەڵام یەکێک لە گەنجەکان دوور بووە لە تەقینەوەکە و بریندار نەبووە.
ئەگەرچی ڕاوکردنی ماسی بە تەقینەوە قەدەغەیە و لەلایەن پۆلیسی دارستانی پارێزگا و قەزا و ناحییەکانەوە هۆشداری لەبارەوە دەدرێت، بەڵام ساڵانە لەکاتی ڕاوەماسیدا چەندین کەس تەقینەوەیان پێدا دەتەقێتەوە یان کارەبا دەیانگرێت.
