دەسەڵاتی کوردی لە ڕۆژئاوای کوردستان پێشوازی لە پێشنیازی سێرگی لاڤرۆڤ وەزیری دەرەوەی ڕوسیا بۆ گفتوگۆکردن لەگەڵ حکومەتی سوریا دەکات، بەڵام دووپاتیدەكاتەوە، حكومەتی سوریا ئامادەی گفتوگۆی جدی نییە و بەردەوامە لە دەستگرتن بە بۆچوونەكانیەوە.
ڕۆژی هەینی سێرگی لاڤرۆڤ وەزیری دەرەوەی ڕوسیا داوای لە ئیدارەی خۆبەرێوەبەری لە باکوور و ڕۆژهەڵاتی سوریا کرد لەگەڵ حکومەتی سوریا کێشەکانیان بە گفتوگۆ چارەسەر بکەن، عێراقی بە نمونەیەکی هاوشێوە باسکرد، بەوەی هەرێمی کوردستان لەگەڵ عێراقدا کێشەکانیان لەڕێگەی گفتوگۆوە چارەسەر دەکەن.
لە ڕاگەیەندراوێکدا ئیدارەی خۆبەڕێوەبەری ڕۆژئاوای كوردستان وەڵامی پێشنیازەكەی لاڤرۆڤی داوەتەوە و ڕایگەیاندووە، “بەڕێز سێرگی لاڤرۆڤ ئێوارەی هەینی باسی لە گفتوگۆ لەگەڵ حکومەتی سوریا کردووە، ئێمە ئەوە وەک هەنگاوێکی ئەرێنی دەبینین بۆ چارەسەرکردنی کێشەکان، هیوادارین ڕوسیا ڕۆڵێکی ئەرێنی هەبێت لەو گفتوگۆیانەدا”.
بەڵام ڕەخنەی ئەوەی هەیە، كە “یەکێک لە سەرەکیترین ڕێگرییەکانی سەرکەوتوبوونی گفتوگۆ، ئەوەیە حکومەتی سوریا هیچ گۆڕانکارییەک قبوڵ ناکات، لەسەر بیکردنەوە و ڕوانینی خۆی بەردەوامە بەبێ گوێدانە ئەو قەیران و نەهامەتییانەی گەلی سوریای تێدایە، حکومەتی سوریا گفتوگۆی جددی نەک لەگەڵ خۆبەڕێوەبەری، بەڵکو لەگەڵ هیچ لایەنێکی دیکە ناکات”.
باسیشی لە هۆکاری شکستهێنانی گفتوگۆکانی پێشوو كردووە و ڕایگەیاندووە، “حکومەتی سوریا سوورە لەسەر گەڕانەوە بۆ ماوەی بەر لە قەیرانی سوریا، هەموو ئەو هەنگاوانەشی حکومەتی سوریا دەیانگرێتەبەر، یەکناگرێتەوە لەگەڵ هەوڵەکانی دەستپێکردنەوەی گفتوگۆکان”.
