وەزارەتى خوێندنى باڵا و توێژینەوەى زانستى ڕایدەگەیەنێت، لە مانگى داهاتووه‌وه پێویستە هاوڵاتییان لە کاتى سەردانیان بۆ وەزارەت کارتى وەرگرتنى ڤاکسینیان پێبێت، بەپێچەوانەوە ڕێگەیان پێنادرێت سەردانى وەزارەت بکەن بۆ ڕاییکردنى مامەڵەکانیان.
وه‌زاره‌ته‌كه له ڕاگه‌یه‌ندراوێكدا ئاماژه‌ى به‌وه كردووه، بە بڕیارى سەرۆکایەتیی ئەنجومەنی وەزیران و لیژنەى باڵاى ڕووبەڕووبوونەوەى کۆرۆنا، چەند بڕیارێک بۆ پاراستنی سەلامەتیى گیانی ھاوڵاتییان و فەرمانبەران و مامۆستایان لە دامودەزگاکانى وەزارەتى خوێندنى باڵا و توێژینەوەى زانستى دەرکرا.
هه‌ر به‌پێی بڕیاره‌كانى خوێندنى باڵا، ئەو فەرمانبەرانەى دیوانى وەزارەت کە خۆیان ڤاكسینكردووه، پێویستە تا ڕۆژى پێنجشەمە ڕێکكەوتى (٢٧/١/٢٠٢٢) وێنەیەک لە ناسنامە یاخود کارتى ڤاکسین بۆ دەزگاى سەرپەرشتى و دڵنیایى جۆرى/ بەڕێوەبەرایەتیى تەندروستى و سەلامەتى لە دیوانى وەزارەت بنێرن.
ئەو فەرمانبەرانەى دیوانى وەزارەت خۆیان ڤاكسیننه‌كردووه، بەبێ تێستى کۆرۆنا کە (٤٨) كاتژمێری بەسەردا تێپەڕنەبووبێت، ڕێگەى پێنادرێت بێتە دەوام و بە نەهاتوو هەژماردەکرێت، لە ڕۆژى دەرچوونى ئەم نووسراوەوە.
له بڕیارێكى دیكه‌دا هاتووه، لە دواى ڕێکەوتى (١/٢/٢٠٢٢) بەدواوە هیچ کەسێک ڕێگەى پێنادرێت سەردانى وەزارەتەکە بکات بەبێ هەبوونى کارتى ڤاکسین یان ئەنجامدانى تێستى کۆرۆنا کە (٤٨) سەعاتى بەسەردا تێپەڕنەبووبێت.
