لیۆناردۆ سپینازۆلا، بەرگریکاری هەڵبژاردەی ئیتاڵیا دووچاری پێکانێکی قورس بووە و بەهۆیەوە ماوەیەکی دوورودرێژ لە یاریکردن دادەبڕێت.
سەرچاوە ئیتاڵییەکان لە نمونەی لاگازێتا دێلۆ سپۆرت و کۆرێری دێلۆ سپۆرت ئاشکرایانکردووە، سپینازۆلا تووشی لێکپچڕانی بەستەری ئەخیل لە قولەپێی چەپی بووە، پشکنینی سەرەتایی ستافی پزیشکیی هەڵبژاردەی ئیتاڵیا دەریخستووە، پێکانەکە قورسە و ئەمڕۆ شەممە بە وردی پشکنینی تیشکی بۆ دەکرێت.
بەپێی سەرچاوەکە، پێکانی بەستەری ئەخیل یەکێکە لە پێکانە هەرە قورسەکان، یاریزان ناچاردەکات چوار تاوەکو شەش مانگ لەژێر چارەسەر و پشوودا بێت، بەڵام ئەوەی نەزانراوە ئایا پێکانەکەی سپینازۆلا لێکپچڕانی تەواوەتییە، یاخود لێکپچڕانی بەشێکی بەستەری قاچی یاریزانەکەیە.
هەموو ئەمانە لە کاتێکدا ڕوودەدەن، کە چەندین یانەی گەورەی وەک ڕیاڵ مەدرید و بەرشلۆنە و مانچستەر یونایتد و پاریس سان جێرمان و بوروسیا دۆرتمۆند خواستیان لەسەر گواستنەوەی یاریزانەكە نیشانداوە.
