ژن و پیاوێکی کوردی خەڵکی ڕۆژهەڵاتی کوردستان، دەڵێن، لە ڕیستۆرانتێکدا لە تورکیا لێیاندراوە و ئاسەواری لێدان بە جەستەیانەوە دیارە.
ئەو ژن و پیاوە دەڵێن، ئەوان بۆ گەشتکردن چوونەتە وڵاتی تورکیا، بەڵام لە ڕیستۆرانتێکدا لەلایەن خاوەنی ڕیستۆرانتەکەوە هێرشیکراوەتەسەر و لێیان دراوە.
بە وتەی ژن و پیاوەکە کاتێک پۆلیس هاتووەتە شوێنی ڕوداوەکە، لایەنگری خاوەن ڕیستۆرانتەکەی کردووە و هیچ لێدوان و قسەیەکی لەو دوو ژن و پیاوە کوردە وەرنەگرتووە.
دوو مانگ پێش ئێستاش خێزانێكی كوردی باشووری كوردستان، كە خەڵكی هەولێر بوون و بۆ گەشت لە تورکیا بوون، کاتێک ویستویانە بچن بۆ ئەنتاڵیا، لەسەر ڕێگای سەرەكیی شارۆچكەیەكی مێرسین، لەلایەن چوار تورکەوە ڕێگەیان پێگیرا و ، سوكایەتییان پێكرا و جنێویان بە كورد دا، دواتر خێزانە كوردەكەیان بەردباران كرد، پیاوی خێزانەكە و كوڕە 12 ساڵییەكەی برینداركراون.
