ڤاکسینەکان بەدرێژایی سەردەمەکانی ڕابردوو دەرچەی ڕزگارکەری مرۆڤایەتی بوون لە پەتا و ڤایرۆسە جۆراوجۆرەکان، بۆ سەردەمی ئێستاش، دژ بە کۆرۆنا، پشت بە ڤاکسین دەبەسترێت، بەپێی توێژینەوەیەکی نوێ، فایزەر و مۆدێرنا دەتوانن بەدرێژایی تەمەن دژەتەن لە جەستەی وەرگرەکانیدا دروستبکەن.
بەپێی توێژینەوەیەکی نوێ، کە توێژەران لەسەر ئەو کەسانە ئەنجامیانداوە دووەم ژەمی ڤاکسینی فایزەر و مۆدێرنایان وەرگرتووە، دەریدەخات بەرگرییەکی بەهێز و درێژمەودا لەجەستەیاندا دروستبووە.
بەپێی ڕۆژنامەی نیویۆرک تایمزی ئەمریکی، ئەنجامی ئەو توێژینەوەیە بەومانایە دێت ئەوانەی دوو ژەمی ڤاکسینی فایزەر و مۆدێرنایان وەرگرتووە، بەرگریی درێژمەودا لە جەستەیاندا دروستدەبێت، ئەگەریشی زۆرە بەدرێژایی تەمەنیان بەرگرییەكە بەردەوامبێت.
یەکێک لە ئەنجامدەرانی سەرەکیی توێژینەوەکە و پسپۆڕی بەرگریی جەستە لە زانکۆی واشنتۆن لە سانت لویس بە ڕۆژنامەكەی ڕاگەیاندوە، “ئەو توێژینەوەیە ئاماژەی باشی پیشانداین لە توانا و ماوەی زۆری مانەوەی ئەو بەرگرییەی لەو ڤاکسینانەوە دروستدەبن”.
