گوڵان نیروان، بەرێوەبەری بازارسازی پێشانگاکە بە تۆڕی میدیایی ئێستای راگەیاند، 200 ناوەند و دەزگای جۆراوجۆر لە 12 وڵاتی جیاوازەوە بەشداریان لە شەشەمین پێشانگەی نێودەوڵەتیی کتێبدا کردووە و 40 هەزار ناونیشانی جۆراوجۆر و 9 ملیۆن کتێب لەخۆدەگرێت.
ناوبراو ئاماژەی بەوەشکرد، بۆ ئەمساڵی پێشانگەی کتێب، زیاتر لە دوو هەزار ناونیشانی نوێ چاپکراوە و پێشانگەکەش بۆ ماوەی 10 رۆژ بەردەوام دەبێت و تاوەکو 8ی مانگی داهاتوو پێشوازی لە سەردانیکەر و خوێنەران دەکات.
هاوکات ئەوەشی خستەڕوو، کردنەوەی ئەم پێشانگایە سوودێکی زۆری بۆ بواری رۆشنبیری و فەرهەنگی تاکەکانی کۆمەڵگا هەیە و کاریگەریی باش لەسەر ئاستی رۆشنبیری دروستدەکات.
ئەمە لەکاتێکدایە، پێشانگەی نێودەوڵەتی ماوەی شەش ساڵە لە شاری سلێمانی ئەنجام دەدرێت، کە لەلایەن دەزگای چاپ و پەخشی ئەتڵەسەوە رێکدەخرێت.
