بەرەبەیانی ئەمڕۆ دەنگی چەند تەقینەوەیەك لە نزیك گوندێكی سەر ڕێگای هەولێر-پیرمام بیستراوە، كە پێدەچێت بەهۆی “كەوتنەخوارەوەی موشەكەوە بوبێت”.
پەیامنێرمان لە هەولێر پێیڕاگەیاندین، بەرەبەیانی ئەمڕۆ، لە نزیك گوندی براغ، كە دەكەوێتە سەر ڕێگای هەولێر-پیرمام، دەنگی چەند تەقینەوەیەكی گەورە بیستراوە.
لەسەر زاری دانیشتوویەكی گوندەكەشەوە ئاشكرایكرد، تەقینەوەكان لەنێوان كاتژمێر 02:45 بۆ 03:00ی بەرەبەیان بووە.
گوندەكە دەكەوێتە نزیك بینای نوێی كونسوڵخانەی ئەمریكا لە هەولێر، كە هێشتا تەواو نەبووە.
لایەنە فەرمییەكان تائێستا هیچ زانیارییەكیان لەبارەی ڕووداوەكەوە بڵاونەكردووەتەوە.
