بەهۆی بۆردوومانێکی فڕۆکە جەنگییەکانی تورکیاوە، 35 مەڕی هاوڵاتییەکی گوندێکی ناحیەی دێرەلوک لەناوچوون.
شیمال سپینداری، خاوەنی پڕۆژەی مەڕوماڵاتە، بە تۆڕی میدیایی ئێستای ڕاگەیاند، “کاتژمێر 4ی ئێوارەی ئەمڕۆ، فڕۆکە جەنگییەکانی تورکیا بۆردومانی پڕۆژەیەکی بەخێوکردنی مەڕ و ماڵاتیان لە گوندی سپیندار کردووە و زیانی مادی زۆریان بە پڕۆژەکە گەیاندووە”.
بە وتەی ئەو خاوەن پڕۆژەکە، بەهۆی بۆردومانەکەوە، سەرەڕای تیاچوونی 35 مەڕ، زیانی مادی بەر بینای پڕۆژەکە کەوتووە و چەندین سەر مەڕی دیکە بریندار بوون.
فڕۆکە جەنگییەکانی تورکیا ئەمڕۆ پێنج جار بۆردوومانی گوندی مژێیان لە دەڤەری بەری گارێی سەربە ناحیەی دێرەلوک کردووە، لە سنوری قەزای ئامێدی.
