کەمێک پێش ئێستا لەسەر شەقامی 60 مەتری هەولێر دەستڕێژی گولـلە لە ئۆتۆمبیلێکی جۆری نیسان سەنترا کرا و دوو کەس کوژراون و کەسێکی دیکە بە سەختی بریندارە.
پەیامنێری تۆڕی میدیایی ئێستا لە هەولێر ڕایگەیاند، “کاتژمێر 11:00 ی ئەمشەو لەسەر شەقامی 60 مەتری لە هەولێر دەستڕێژی گولـلە لە ئۆتۆمبیلێکی جۆری نیسان سەنترا کراوە و بەهۆیەوە دوو کەس کوژراون و کەسێکی دیکە بە سەختی بریندار بووە “.
پۆلیسی هەولێر لەسەر ڕوداوەکە دەڵێت، “دوای ئەوەی ئەمشەو لە شەقامی 60 مەتری دوو تۆمەتبار، كە بران، لەسەر كێشەیەكی كۆمەڵایەتی دەستڕێژی گوللـە لە خوشكەكەیان و زاواكەیان و كەسێكی تر دەكەن، دەستبەجێ تیمەكانی پۆلیس گەیشتنە شوێنی رووداو و دەركەوت كە لە ئەنجامی تەقەكان دوو پیاو بە ناوەكانی (ا. ت. ح) و (ك. ق. ع) گیانیان لە دەست داوە و ئافرەتێكیش بە ناوی (ج. ح. م) زامدار بووە”.
پۆلیس ئاماژەی بەوەشکردووە، “لە ئێستادا تیمەكانی بەڕێوەبەرایەتیی پۆلیسی پارێزگای هەولێر لە شوێنی رووداوەكەن بە مەبەستی بەدواداچوون و لێكۆڵینەوەی زیاتر و لە ئایندەیەكی نزیكدا ئەنجامی لێكۆڵینەوەكان بڵاو دەكەینەوە”.
ڕوداوەکەی ئەمشەو لە کاتێکدایە شەوی ڕابردوو لە ناحیەی قوشتەپەی پارێزگای هەولێر، بەهۆی کێشەی نێوان دوو دراوسێوە، کەسێک کوژرا و شەشی دیکە برینداربوون.
ڕوداوەکەی دوێنێ کاتژمێر 8:30 ڕویدا، لەسەر وەستان لەناو کۆڵاندا، کێشە لەنێوان دوو دراوسێی ناحیەی قوشتەپەدا دروست بوو و هەردوولا تەقەیان لەیەککرد و، لە ئەنجامدا گەنجێک بەناوی کۆسرەت زرار کوژرا.
