ئەندامێكی هاوپەیمانی فەتح لە ئەنجومەنی نوێنەران ڕایدەگەیەنێت، بێدەنگی حکومەتی عێراق وایكردووە توركیا زیاتر بێتە ناو قوڵایی خاکی عێراقەوە و سەروەری خاکەکەی پێشێلبكات.
محەمەد شەبەکی، ئەندامی هاوپەیمانی فەتح كە هادی عامری سەرۆكایەتی دەكات ڕایگەیاندووە، “سوپای تورکیا سەرقاڵبوونی عێراقی بە شەڕی داعش قۆستووەتەوە و زیاتر هاتووەتە نێوخاکی عێراقەوە”.
ئاماژەی بەوەشكردووە، “بێدەنگی عێراق لەبەرامبەر ئەو دەستدرێژییانە وایكردووە توركیا زیاتر بێتە ناو قوڵایی خاکی عێراقەوە”.
بەوتەی پەرلەمانتارەكەی فەتح، “تورکیا هەوڵی تۆقاندنی هاوڵاتیانی هەرێمی كوردستان دەدات و بەشێکی زۆری خاکەکەشی داگیر کردووە”.
هەروەها شەبەكی داوا لە حکومەت دەکات، ڕاستییەکانی دەستێوەردانی سەربازی تورکیا لەخاکی عێراق ئاشکرا بکات و هۆكاری بێدەنگییە گوماناوییەكەی بۆ خەڵك ڕونبكاتەوە”.
