باوکی هێلێنی 19 ساڵ، دوای گیان لە دەستدانی کچەکەی، کە وەک خۆی دەڵێت بە “حەبی قەڵەوی” گیانی لە دەستداوە دەلێت، “کچەکەمان بە دزی ئێمەوە حەبەکانی بەکارهێناوە و لە کۆی 60 حەب 36 حەبی خواردووە”.
باوکی هێلێن دەڵێت، “دوای خواردنی ئەو ژمارە حەبە کچەکەمان کێشەی تەندروستی بۆ دروستبوو و دواتر بردمانە پشکینینی پزیشکی و دەرکەوت بەهۆی خواردنی مادەیەکی زیان بەخشەوە وایلێهاتووە”.
وەک کەسوکاری هێلێن بۆ تۆڕی میدیایی ئێستا باسی دەکەن، کچەکەیان پێش گیان لە دەستدانی کێشەی میزکردن و سوتانەوەی مەعیدە و ریخۆڵەی بۆ دروستبووە، کە پزیشکەکان بۆ خواردنی مادەیەکی ژەهراوی دەگێڕنەوە.
هاوکات بەڕێوەبەرایەتی تەندروستیی هەولێر لە ڕونکردنەوەیەکدا بۆ تۆڕی میدیایی ئێستا ڕایگەیاند، ” تیمی پشکنین و بەدواداچوونی بەڕێوەبەرایەتیمان هەر لەسەرەتای بڵاوبوونەوەی ئەم هەواڵە دەستی بە بەدواداچوون و لێکۆلینەوە کردووە و هەوڵەکان بەردەوامن بۆ دەرکەوتنی هۆکاری زانستی ئەم گیان سپاردنە و لەهەر ئەگەرێک سەرپێچی کاران رووبەرووی یاسا دەکرێنەوە”.
باوکی هێلێن داوا لە حکومەت و پەرلەمانی کوردستان دەکات، ڕێگە چارەیەک یان یاسایەک دەربکەن بۆ ڕێگری لە فرۆشتن و بەکارهێنانی دەرمانی ئۆنلاین، چونکە ئەوان گومانیان نییە کچەکەیان کێشی کەمبووە و دوای خواردنی ئەو حەبانە کە کەس نازانێت لەکوێ کڕیوویەتی گیانی لە دەستداوە.
هێلێن پێشتریش لای کەسوکارەکەی باسی لاوازی کێشی خۆی کردووە و دوای کردووە چارەسەرێکی بۆ بدۆزنەوە، بەڵام دواجار لەڕێگەی ئۆنلاینەوە پەنای بۆ ئەو جۆرە حەبە بردووە.
ئەو حەبەی هێلێن بەکاریهێناوە هیچ سەرچاوەیەکی پزیشکی و ناوەندێکی ناوچەیی و جیهانی پشتگیری نەکردووە، ئەگەرچی لەسەر قوتوی دەرمانەکە نوسراوە لە وڵاتی ئەڵمانیا دروستکراوە.
