ئەنجومەنی وەزیرانی هەرێم رایدەگەیەنێت، تەمەنی یاسایی خانەنشینیی سەرجەم فەرمانبەران لە هەرێمی كوردستان دەكرێتە تەواوكردنی تەمەنی 60 ساڵی و هەر فەرمانبەرێك بە رۆژ و مانگ و ساڵ 60 ساڵی تەواو كرد، پێویستە دەستبەجێ رەوانەی بەڕێوەبەرایەتیی خانەنشینی بكرێت.
ئاماژە بۆ ئەوەش كراوە، پاڵپشت بە حوكمەكانی ماددەی (10/یەكەم) لە یاسای خانەنشینیی یەكگرتوو ژمارە (9)ی ساڵی 2014ی هەمواركراو، تەمەنی یاسایی خانەنشینیی سەرجەم فەرمانبەران لە هەرێمی كوردستان دەكرێتە تەواوكردنی تەمەنی 60 ساڵی و هەر فەرمانبەرێك بە رۆژ و مانگ و ساڵ تەمەنی 60 ساڵی تەواوكرد، پێویستە خانەنشین بكرێت.
بەدەر لە:
1. ئەو فەرمانبەرانەی یاسای راژەی زانكۆیی دەیانگرێتەوە و هەڵگری ناونیشانی (پڕۆفیسۆر و پڕۆفیسۆری یاریدەدەر)ن.
2. پزیشكانی دادوەری و پزیشكانی سڕكردنی و پزیشكانی دەروونی.
3. ڕاوێژكاران و ڕاوێژكارانی یاریدەدەر لە ئەنجومەنی شوورای هەرێم.
4. فڕۆكەوانانی مەدەنی لەوانەی كار دەكەن وەك كاپتنی فڕۆكە بە شێوەیەكی كرداری و لە كاتی خۆیدا مۆڵەتی كاركردنی بەركاریان هەیە.
حكومەتی هەرێم دەشڵێت، “سەبارەت بە خانەنشینكردن لەسەر داوای فەرمانبەر، هەر فەرمانبەرێك بە تەواوكردنی 45 ساڵ تەمەن و بوونی (15) ساڵ خزمەت فەرمانی خانەنشینكردنی دەرچووبێت بەر لە دەرچوونی بڕیاری ئەنجومەنی وەزیران ژمارە (259) لە 3/7/2024، پێویستە مامەڵەی خانەنشینییەكەی راییبكرێت، لە دوای رێككەوتی بڕیاری سەرەوە، حكومەكانی ماددەی (12/یەكەم) لە یاسای خانەنشینیی یەكگرتوو ژمارە (19)ی ساڵی 2014ی هەمواركراو پیادە دەكرێت و پێویستە فەرمانبەرەكە تەمەنی پەنجا ساڵی تەواوكردبێت یان ڕاژەی خانەنشینییەكەی لە (25) ساڵ كەمتر نەبێت.
