بافڵ تاڵەبانی هاوسەرۆکی یەکێتیی نیشتمانیی کوردستان لەگەڵ ژان ژیرۆم سەرۆکی خاچی سوری نێودەوڵەتی گفتوگۆیان لەبارەی گرفتە ژینگەییەکانی عێراق و پاراستنی سەرچاوە ئاوییەکانەوە کرد.
لە دیدارەکەدا لەبارەی چالاكییه مرۆییهكان و کاریگەرییان لەسەر کۆمەڵگا و رووبەڕووبوونەوەی وشکەساڵی، پاراستنی سەرچاوە ئاوییەکان و زاڵبوون بەسەر گرفتە ژینگەییەکان و کەمبوونەوەی ئاو گفتوگۆکرا.
هەروەها باس لە پلانی ڕێکخراوی خاچی سوری نێودەوڵەتی لەبارەی ئەو گرفتانەوە لە عێراق و هەرێمی کوردستان کرا.
بافڵ تاڵەبانی، بەگرنگییەوە لەکارەکانی خاچی سوری نێودەوڵەتی ڕوانی لە خزمەتکردن و پێشکەشکردنی ھاوکاری و دابینکردنی پێداویستییەکانی ئاوارەکان و ئەو خێزانانەی بەھۆی باردۆخی عێراقەوە زیانیان بەرکەوتووە.
داواشیکرد لەکار و ھەنگاوەکانیان بەردەوامبن لەخزمەتکردن بە ژینگە و کارە مرۆییەکان و ڕۆڵی زیاتربگێڕن لەچارەسەرکردن و ڕوبەڕوبوونەوەی ئەو گرفتە مرۆیی و ژینگەییانەی دووچاری عێراق و ھەرێم و ناوچەکە بوونەتەوە.
بافڵ تاڵەبانی پشتیوانی و ھەماھەنگی یەکێتی بۆ سەرخستنی کارەکانی رێکخراوە مرۆییەکان دووپاتکردەوە بۆ دانانی ستراتیژی نوێ بۆ کەمکردنەوەی زیانەکان و زیاتر خزمەتکردن بەکایەکانی کۆمەڵگا و ھەماھەنگی رێکخراوەکانیشی بەگرنگزانی بۆ خزمەتکردنی ئەو خەڵکانەی پێویستییان بەھاوکاری و ئاوڕدانەوەیە.
