ئێوارەی دوێنێ لە گەڕەکی ڕزگاری لە شاری سلێمانی هاوڵاتییەک کە سەرقاڵی نۆژەنکردنەوەی ماڵەکەی بووە، لەلایەن چوار کرێکارەوە بە چەکوش کوژراوە و ئۆتۆمبیلەکەشی براوە.
سەرچاوەیەک لە فریاکەوتنی خێرای سلێمانییەوە بە تۆڕی میدیایی ئێستای ڕاگەیاند، “هاوڵاتییەک بەناوی عوسمان حەمە سەعید، براوەتە پزیشکی دادی سلێمانی و ئاسەواری پیاکێشان بە سەرییەوە جێماوە و گیانی لە دەستداوە”.
کەسوکاری ئەو هاوڵاتییە کوژراوە ئاشکرایدەکەن، “ئەو کەسەیان کاتێک سەرقاڵی سەرپەرشتیکردنی نۆژەنکردنەوەی خانوویەکی برایەکی بووە لە گەڕەکی ڕزگاری، لەلایەن چەند کرێکارێکی عەرەبەوە لێدراوە و پاشان موبایلەکەیان شکاندووە و ئۆتۆمبیلەکەشیان دزیووە”.
بە وتەی کەسوکارەکەی قوربانییەکە کێشەی لەگەڵ کەس نەبووە و بەپێی شێوازی ڕوداوەکە دەردەکەوێت بۆ ئۆتۆمبیلەکەی کوژراوە، بەتایبەت دوای ئەوەی، کرێکارەکان عەرەب بوون و بۆ ئەوان ئاسانترە ونکردنی ئۆتۆمبیلەکە.
پۆلیسی سلێمانی دەڵێت، لێکۆڵینەوە لە ڕوداوەکە بەردەوامە و هەموو بەڵگە و وتەکانیان وەرگرتووە بۆ دۆزینەوەی تۆمەتباران و دەرکەوتنی ڕاستی ڕوداوەکە.
