بەڕێوەبەری ژمێریاریی لە بەڕێوەبەرایەتیی گشتیی پەروەردەی سلێمانی ڕایدەگەیەنێت، ئەو فەرمانبەرانەی كە ماوەی خزمەتیان تەواودەكەن و خانەنشین دەكرێن ئەو پلەبەرزكردنەوەیەی شایستەیان بووە و بەهۆی بڕیاری راگرتنی پلەبەرزكردنەوەوە دەفەوتێت و جارێكی دیكە بۆیان ئەژمار ناكرێت لەكاتێكدا ئەگەر حكومەت هەر كاتێك بڕیاری دەستپێكردنەوەی پلەبەرزكردنەوەش بدات.
شێركۆ سەعید بەڕێوەبەری ژمێریاری لە بەڕێوەبەرایەتیی گشتیی پەروەردەی سلێمانی لە لێدوانێكدا بە تۆڕی میدیایی ئێستای ڕاگەیاند، ماوەی چەند ساڵێكە بڕیاری راگرتنی پلەبەرزكردنەوە دراوە و ئەو مووچەخۆرانەی لە سەرەتای ساڵی نوێ خانەنشین دەبن ئەگەر تا ئەو كاتە پلەرزكردنەوە دەستپێنەكاتەوە ئەوا ئەو پلەیەی شایستەیان بووە كاتێك خانەنشین دەبن دەفەوتێت و هەر مووچەخۆرێك كە خانەنشین دەبێت شایستەی پلەبەرزكردنەوەكەی نامێنێت.
ئاماژەی بۆ ئەوەش كرد، هەر فەرمانبەرێك كە شایستەی پلەبەرزكردنەوە بووبێت و لە ماوەی چەند ساڵی ڕابردوودا بۆی ئەژمارنەكراوە لە فەرمانگەكانیان تۆماركراوە و هەر كاتێك حكومەت بڕیار بدات مافیان نافەوێت، بەڵام ئەو كاتەش پێویستی بە دەركردنی رێنمایی پێویست دەبێت سەبارەت بە شێوازی دەستپێكردنەوەی پلەبەرزكردنەوەی فەرمانبەران.
