یانەی تۆتنهام هۆتسپێرێزی ئینگلیزی بەدوای ڕاهێنەرێکی نوێدا دەگەڕیت، هەوڵەکانیان بۆ گواستنەوەی ئەنتۆنیۆ کۆنتی شکستیهێناوە و لەگەڵ ڕاهێنەرێکی دیکە دانوستاندنیان دەستپێکردووە.
ڕۆژنامەی “دەیلی میرەر”ی بەریتانی بڵاویکردووەتەوە، لە چەند هەفتەی ڕابردوودا دانیێل لیڤی سەرۆکی یانەی کەڵەشێرە ڕوومییەکان لەگەڵ ئەنتۆنیۆ کۆنتی ڕاهێنەری ئیتاڵی و پێشووی ئینتەر میلان دەستی بە دانوستاندنێکی چڕوپڕ کردووە، بەڵام لەکۆتاییدا ڕاهێنەرەکە باوەڕی تەواوی بە پڕۆژەی یانە ئینگلیزییەکە نەهێناوە و تەواوی گفتوگۆکان شکستیانهێناوە.
هەوڵەکانی لیڤی لێرەدا نەوەستاوە، بەڵکو ئاڕاستەیان ڕووەو ئیریک تین هاگی هۆڵەندی ڕاهێنەری یانەی ئەیاکس ئەمستەردام گۆڕیوە.
تین هاگ وەک ڕاهێنەر 389 یاری ئەنجامداوە، 246 بردنەوە و 66 یەکسانبوون و 77 دۆڕاندنی تۆمارکردووە، لە ساڵی 2017وە پۆستی ڕاهێنەری ئەیاکس ئەمستەردامی بەدەستهێناوە و ئەزموونی نۆ ساڵ کارکردنی لە پۆستی ڕاهێنەری یانەکاندا هەیە، بە تیپەکانی لاوان و پێگەیشتووانەوە.
