بەرەی دژ بە بڕینەوەی درەختەکان فراوانتر دەبێت.. بەرهەم ساڵح: چاوپۆشی ناکەین

تا دێت پرسی بڕینەوەی درختی سنوری نێوان هەرێم و تورکیا گەورەتر دەبێت و بەرەی دژ فراوانتر، سەرۆککۆماری عێراقیش دەڵێت، “ئەوەی ڕویداوە تاڵانییە و مایەی چاوپۆشی نییە”.

بەرهەم ساڵح، سەرۆککۆماری عێراق لە تویتێکدا ڕایگەیاند، ” سەرباری لەشكرێشی وپێشێلكردنی سەروەری و شەڕ وئاوارە بوونی خەڵك، بڕینەوەی دارستانە سروشتیەكان لە هرور وباتیفا وناوچە سنووریەکانی كوردستان تاوانە دژ بە مرۆڤ و ژینگە”.

سەرۆککۆماری عێراق ڕاشیگەیاندووە، “ئەوەی ڕویداوە مایەی چاوپۆشی نیە و ئەركمانە لە حكومەتی فیدراڵ وهەرێم هاوكاربین بۆ ڕاگرتنی ئەم دەستدرێژی وتاڵانیە، وسزادانی تاوانكاران”.

هەر ئەمڕۆ ڕێکخراوی (CPT)ی نێودەوڵەتی لەبارەی هێرشی سوپای تورکیا بۆسەر سنورەکانی هەرێم ڕاپۆرتێکی بڵاوکردەوە و ڕایگەیاند، “سوپای تورکیا بە دانیشتوانی چەندین گوندی وتووە، بگەڕێنەوە سەر زەویوزارەکانیان، دەکوژرێن”.

تیمی کوردستانی ڕێکخراوی (CPT) لە ڕاپۆرتەکەیاندا ئاشکرایانکرد، “تا ئێستا دانیشتوانی نزیکەی 100 گوند لە سنوری ناحیەی کانی ماسێ و دەوروبەری ئاوارەبوون و ترس و دڵەڕاوکێ لە نێوان دانیشتوانی دەیان گوندی دیکە بڵاوبۆتەوە، چونکە ئەوەی سوپای تورکیا دەیکات داگیرکردنی ناوچەکە و دروستکردنی شوێنێکە وەک ناوچەی ئارام لە نێوان تورکیا و ئێران و عێراقدا”.

ڕاپۆرتی ڕێکخراوەکە ئاماژە بەوەدەکات، “سوپای تورکیا لە مانگی نیسانی ئەمساڵەوە، چەندین بارەگای لە ناوچەکانی نزیک ئاڤاشین و ناحیەی کانی ماسێ دروستکردووە و لەگەڵ دروستکردنی بارەگاکاندا، جوڵە و ژیانی دانیشتوانی گوندەکانی قەدەغەکردووە”.

ڕاپۆرتەکە دەڵێت، “زیانی گەورە بەر چەندین ماڵی گوندنیشینانی نزیک هێرشەکانی تورکیا کەوتووە و هاوکات لە بۆردوومانی ناوچەی مسکێدا، کەنیسەیەک بۆردومان کراوە”.

بابەتی پێشتر

بەهۆی شەڕی دوو خێڵی کوردەوە پێنج کەس کوژراون

بابەتی دواتر

قەدەغەی هاتوچۆ لە خاڵی سنوری باشماخ بۆ 15 ڕۆژی دیکە درێژدەکرێتەوە

بابەتی پەیوەندیدار
Total
3
Share