هێزەکانی پاراستنی گەل – هەپەگە دەڵێت، گەریلا سوپای توركیای ناچاركردووە لە سێ ناوچەی ئاڤاشینی باشووری كوردستان بكشێتەوە، بۆیە بەئەنقەست بە بۆمبی ئاگرین شوێنی هاوڵاتییانی مەدەنی بۆردوومان دەكات و زەویوزاریان دەسوتێنێت.
ناوەندی ڕاگەیاندن و چاپەمەنیی هێزەکانی پاراستنی گەل، كە باڵی سەربازیی پەكەكەیە، ڕاگەیەنراوێكی بڵاوكردەوە، ئاشكرایكردووە، سوپای توركیا لە دوو ڕۆژی ڕابردوودا “لە ناوچەکانی دۆڵی ماران، تابووری عەرەبەکان و دۆڵی کۆنفرانس لە هەرێمی ئاڤاشین، هەندێک پاشەکشەیان کردووە”.
هەپەگە هۆكاری پاشەكشەكەی توركیای بۆ چالاكییەكانی گەریلا گەڕاندووەتەوە.
هەپەگە دەشڵێت، سەرباری ناڕەزایەتیی گەل لە باشووری کوردستان، سوپای توركیا هێشتا بە ئەنقەست شوێن و واری هاوڵاتییانی مەدەنی، دەوروبەری گوندەکان، باخ و ڕەزی هاووڵاتییان بۆردومان دەکات، هەروەها لە بۆردومانەكانیدا بۆمبی ئاگرین بەكاردەهێنێت، كە دەبنە هۆی کەوتنەوەی ئاگر لەناوچەکەدا.
