یانەی ناپۆلیی ئیتاڵی بەفەرمی لوچیانۆ سپالێتی وەک ڕاهێنەری نوێ و جێگرەوەی جینارۆ گاتوسۆ ناساند.
لەو بارەیەوە ئاوریلیۆ دی لاورێنتس، سەرۆکی یانەی ناپۆلی بە ماڵپەڕی یانەکەی ڕاگەیاند، “بەخێرهاتی لوچیانۆ، بەیەکەوە کارێکی ناوازە دەکەین، بەخۆشحاڵییەوە پێتان ڕادەگەیەنم لوچیانۆ ڕاهێنەری نوێی یانەکەمانە و کار و پڕۆژەکانمان لەگەڵ ئەم ڕاهێنەرەدا بەردەوامدەبێت”.
بەپێی ئەو زانیارییانەی لەسەرچاوە ئیتاڵییەکانەوە بڵاودەکرێنەوە، بۆندی سپالێتی و ئیدارەی “پارتینۆپێ” بۆ ماوەی دوو وەرزە، واتا تاوەکو هاوینی 2023 بەردەوامیی دەبێت.
سپالێتی لە تەمەنی وەرزشییدا ڕاهێنەری چەندین یانەی گەورەی وەک ئینتەرمیلان و ڕۆما و زینیتی ڕووسی بووە، بەڵام ماوەی دوو وەرزە لەدوای دەستبەرداربوونی لە پۆستی ڕاهێنەری ئینتەرمیلان، بێکارە و پەیوەندی بە هیچ یانەیەکی دیکەوە نەکردووە.
