لە کۆبوونەوەی لەگەڵ شاندێکی یەکێتی بافڵ تاڵەبانی، هاوسەرۆکی یەکێتیی نیشتمانیی کوردستان ڕایگەیاند، نابێت بەناوی یاساوە سنوورەکانی کاری ڕۆژنامەوانی بەرتەسکبکرێتەوە و لەگەڵ سزادانی سیاسی نەبووین و نابین، ناشمانەوێت گەنجەکانی بادینان ببنە قوربانی مەرامی سیاسی و لە هەوڵەکانمان بەردەوامین لەپێناو ئازادکردنیان.
ئێوارەی ئەمڕۆ 27ی ئایار، بافڵ تاڵەبانی، هاوسەرۆکی یەکێتی نیشتمانیی کوردستان لەگەڵ مارتن هووس، باڵیۆزی یەکێتیی ئەوروپا لە عێراق و ڤێنسنت گیووم پۆپۆ، بەرپرسی نووسینگەی یەکێتیی ئەوروپا لە هەرێمی کوردستان کۆبوویەوە.
بافڵ تاڵەبانی بەڕوونی گۆشەنیگای یەکێتی لەبارەی ئازادی و ئازادی رادەربڕین خستەڕوو و ئاماژەی بەوەکرد یەکێتیی نیشتمانیی کوردستان لەسەرەتاوە لەسەر بنەمای ئازادی و ئازادی رادەربڕین دامەزراوە و یەکێک لەکۆڵەکەکانی بونیادی یەکێتی، رەخنە و رەخنە لەخۆگرتن و رەخساندنی زەمینەی لەبار بووە بۆ نووسەر و رۆژنامەنووسان. نابێت بەناوی یاساوە سنوورەکانی کاری رۆژنامەوانی بەرتەسک بکرێتەوە و دژی هەموو رێگری و سنووردارکردنێکی کارەکانی ئەو توێژە گرنگەی کۆمەڵگاین.
بافڵ تاڵەبانی وتیشی، “داوا لە سەرۆکی ھەرێمی کوردستان دەکەین لەبەرامبەر دۆسییەی سزادراوانی بادیناندا دەسەڵاتی خۆی بەکاربهێنێت و دەبێت بەھەموومان رێگری لەم پێشهاتە مەترسیدارە بکەین کە لەئەگەری بەردەوامبوونیدا ناوبانگی ھەرێمەکەمان لەکەداردەکات”.
ھاوسەرۆکی یەکێتی راشیگەیاندووە، یەکێتی لەگەڵ بوونی میدیایەکی ئازاد و بوێردایە، چونکە پێمانوایە ئەزموونی دیموکراتی ھەرێم و ئەم کۆمەڵگایەی شانازی پێوەدەکەین بەستراوەتەوە بە دەنگی ئازاد و میدیای ئازاد و ئازا، کە بۆ ئەوەش ھەموو ھەوڵێکمان روو لە ڕەوینەوەی ئەو بۆچوونانەیە کە لەسەر ئاستی کۆمەڵگای نێودەوڵەتی باس لە بەرتەسککردنەوەی ئازادییەکان دەکەن.
هەڵبژاردنەکانی داهاتووی عێراق تەوەرێکی تری کۆبوونەوەکە بوو و هاوسەرۆکی یەکێتی رایگەیاند، یەکێتی لەگەڵ بەڕێوەچوونی هەڵبژاردنە لەکاتی خۆیدا و پێویستە هەڵبژاردنێکی پاک و بێگەرد بە چاودێری رێکخراوە نێودەوڵەتییەکان بەڕێوەبچێت.
