وەزارەتی تەندروستیی هەرێمی کوردستان ڕوونکردنەوەیەکی سەبارەت بەو نەخۆشە بڵاوکردەوە، کە لە یەکێک لە نەخۆشخانە تایبەتەکانی شاری هەولێردا بەزۆر هێڵراوەتەوە، جەخت لە گرتنەبەری ڕێکاری پێویست لە هەر پێشێلکارییەک بەرامبەر نەخۆش دەکاتەوە.
میدیاکانی هەرێمی کوردستان هەواڵی مانەوە و ڕاگیرانی ژنێکی نەخۆشیان لە یەکێک لە نەخۆشخانە تایبەتەکانی شاری هەولێر بڵاوکردەوە، کە بەهۆی بوونی کێشە لە دابینکردنی پارەی پێویست لەلایەن نەخۆشەکەوە لەبەرامبەر نەشتەرگەری و مانەوەی لەو نەخۆشخانەیە، نزیکەی مانگ و نیوێکە لە نەخۆشخانەکە ڕێگەنادەن بڕواتە دەرەوە.
لەوبارەیەوە وەزارەتی تەندروستی ڕایگەیاند، لەسەر ئەو کێشەیە بە بڕیاری وەزیری تەندروستی، لێژنەكانی پشكنین و بەدواداچوون سەردانی ئەو نەخۆشەیان كردووە و “بەدواداچوونی وردەكاری كێشەكە بەردەوامە بۆ گەیشتن بە هۆکار یان هەر پێشێلکارییەکی مافی نەخۆش”.
بەپێی ڕوونکردنەوەکەی وەزارەتی تەندروستی، “لە هەر کەمتەرخەمی و سەرپێچییەک ڕێكاری پێویست دەگیرێتەبەر و ڕای گشتیی لێ ئاگاداردەكرێتەوە”.
وەزارەتی تەندروستی داواش لە هاوڵاتییان دەکات، بۆ هەر گلەیی و داواکاری و سکاڵا و پێشنیارێک، وەزارەتی تەندروستی ئاگاداربکەنەوە لەڕێگەی سندوقەکانی سکاڵا لە هەر نەخۆشخانەیەک، یان لەڕێگەی پەیوەندیکردن بە ژمارەی هێڵەکانی گەرم بۆ بەدواداچوون و پشکنین بەم ژمارانە ٠٧٥٠٨١٦٩٩٩ ، ٠٧٧١٤٤٤٨١٠.
