پەرلەمانتارێكی عێراق ڕایدەگەیەنێت، لە هەربەرمیلێكی نەوتدا زیاتر لە 15 دۆلار چووەتە سەرئەو نرخەی لە یاسای بودجەدا دیاریكراوە، دیار نییە حكومەت ئەو پارەیە لە چیدا خەرجدەكات، مانەوەی نرخی دۆلاریشی بەم شێوەیەی ئێستا تا چوار ساڵی دیكە دووپاتكردەوە.
حەسەن خەڵاتی، پەرلەمانتاری عێراق لە لێدوانێكی رۆژنامەوانیدا ڕایگەیاندووە، لە یاسای بودجەدا نرخی بەرمیلێك نەوت بە 45 دۆلار دیاریكراوە، بەڵام لە ئێستادا بۆ سەرووی 60 دۆلار بەرزبووەتەوە و لە هەر بەرمیلێكدا زیاتر لە 15 دۆلار دەمێنێتەوە.
ئاماژەی بەوەشكردووە، “لە یاسای بودجەدا بە ڕەشنووسێك ئەوە دیارینەكراوە ئەو بڕە پارەیەی دەمێنێتەوە حكومەت چی لێبكات، بۆیە داوا لە ئەنجومەنی وەزیران دەكەین بۆ پەرلەمانی ڕوونبكاتەوە كە چی لەو بڕە پارەیە دەكەن”.
لە بارەی ئەگەری دەستكاریكردنی نرخی دۆلاریش، خەڵاتی جەختیكردووەتەوە، تا چوار ساڵی دیكە ئەو نرخە گۆڕانكاریی بەسەردا نایەت.
