بۆ ڕوبەڕووبوونەوەی غەڕناتە، زینەدین زێدان بانگهێشتی مارسێلۆی بەرازیلی نەکرد، ئەم بڕیارەش لەنێو میدیاکانی ئیسپانیا سەدایەکی بەهێزیدایەوە.
ڕۆژنامەی مارکای ئیسپانی نوسیویەتی، هیچ کێشەیەکی تایبەتی لەنێوان زێدانی ڕاهێنەر و مارسێلۆی یاریزانیدا ڕووینەداوە، بەڵکو بەهۆی کەمتەرخەمی لە جێبەجێکردنی وردەکارییە تاکتیکییەکان، ڕاهێنەر بڕیاریداوە بەرگریکارەکە چەپلەرەکە بانگهێشتی یاری غەڕناتە نەکات.
بەپێی سەرچاوەکە، مارسێلۆ بە شێوەیەکی ئاسایی ڕاهێنانەکانی ئەنجامداوە و هیچ کێشەیەکی نەبووە، بەڵام لە ڕاستیدا بێزارە لەوەی لەم وەرزەدا سوودێکی ئەوتۆی بە ڕیاڵ مەدرید نەگەیاندووە، هەروەها فێرلاند مێندی پێگەکەی لێسەندووە و لە ئێستاشدا میگێل گوتیرێز توانیویەتی پێگەی بەرگریکاری دووەمی لێزەوت بکات.
هەموو ئەمانە لەکاتێکدایە کە خودی زێدان لە کۆنگرەیەکی ڕۆژنامەوانیدا ڕایگەیاندووە، کە مارسێلۆ هەستی بە ئازاری پێیەکانی کردووە و لەبەر ئەو هۆکارە لە پێکهاتەکەیدا بانگهێشتی نەکردووە.
مارسێلۆ تەمەنی گەیشتووەتە 33 ساڵ و توانا هونەریی و جەستەییەکانی ساڵانی ڕابردووی لەدەستداوە، بۆیە زێدان هەنگاو بە هەنگاو لە پێکهاتەی یەکەم دووریدەخاتەوە و گوتیرێز بۆ پێگەکەی ئامادەدەکات، بڕیارەکەشی جێگەی ڕەزامەندی هاندەران و تەنانەت ئیدارەی لۆس بلانکۆس بووە.
مارکا دووپاتیدەکاتەوە، بەدەر لە کێشە تەکنیکییەکان، زێدان و مارسێلۆ پەیوەندی نێوانیان نایابە و هیچ کێشەیەکی تێدانییە.
