تا ئێستا هیچ دامەزراوەیەكی فەرمیی هەرێمی كوردستان، هیچ كاردانەوەیەكی بەرامبەر بە هێرشكردنە سەر خێزانە كوردەكەی باشووری كوردستان نەبووە، كە لە توركیا لەلایەن چەند نەژادپەرستێكەوە بەردباران و بریندار كران.
دوای نیوەڕۆی دوێنێ پێنجشەممە، خێزانێكی كوردی باشووری كوردستان، كە خەڵكی هەولێرن و بۆ گەشت لە تورکیا بوون، کاتێک ویستویانە بچن بۆ ئەنتاڵیا، لەسەر ڕێگای سەرەكیی شارۆچكەیەكی مێرسین، لەلایەن چوار تورکەوە ڕێگەیان پێگیراوە، سوكایەتییان پێكردوون و جنێویان بە كورد داوە، دواتر خێزانە كوردەكەیان بەردباران كردووە، پیاوی خێزانەكە و كوڕە 12 ساڵییەكەی برینداركراون، باوكەكە برینەكەی سەختبووە و گواستراوەتەوە بۆ نەخۆشخانە.
نزیكەی 24 كاتژمێر بەسەر هێرشكردنە سەر خێزانە هەولێرییەكە تێدەپەڕێت، بەڵام تا ئێستا هیچ لایەنێك و دەسەڵاتە فەرمییە جیاوازەكانی هەرێمی كوردستان، كاردانەوە و قسەیان لەسەر ئەو پرسە نەبووە.
بەڵام پارێزەرانی ئاماد ئەمڕۆ هەینی بە شاندێك گەیشتنە مێرسین، دەیانەوێت بەدواداچوون بۆ ڕووداوەكە بكەن و هاوكاریی خێزانە كوردەكە بكەن.
