وەزیری بەرگریی توركیا بەیاوەری ژمارەیەك لە گەورە بەرپرسانی سەربازی، بنكەیەكی سەربازیی وڵاتەكەی لەناو خاكی هەرێمی كوردستان بەسەركردەوە.
خولوسی ئاكار، وەزیری بەرگریی توركیا ئێوارەی دوێنێ بە یاوەریی سەرۆك ئەركان و فەرماندەی گشتیی هێزە وشكانییەكانی توركیا، بنكەیەكی سەربازیی وڵاتەكەی لەناو هەرێمی كوردستان بەسەركردەوە.
سەردانەكە هاوكاتە لەگەڵ بەردەوامیی ئەو پڕۆسە سەربازییەی لە ڕۆژی هەینی 23ی نیسانەوە، بە بیانووی هێرشكردنە سەر بنكە و بارەگاكانی پارتی كرێكارانی كوردستان (پەكەكە)، بۆسەر ناوچە و گوندەكانی دەوروبەری ناحیەی كانی ماسێ سەر بە قەزای ئامێدی لە پارێزگای دهۆك دەستیپێكردووە و تائێستا درێژەی هەیە.
خولوسی ئاكار لەمیانەی بەسەركردنەوەكەیدا پڕۆسە سەربازییەكانی وڵاتەكەی بە “سەركەوتوو” ناوبرد و ڕایگەیاند، بەردەوام دەبێت.
لەمیانەی ئۆپراسیۆنەكانی ئەم دواییەدا، سوپای توركیا سێ خاڵی سەربازیی لە گوندەكانی هرورێ و چەلكی و كەستێ داناوە.
